Act 9 | NdeIBE | STEP | Kusenjalo, uSawuli wayelokhu ekhihliza izisongo zokubulala abafundi beNkosi. Waya kuMphristi ophezulu

Acts 9

Ukuphenduka KukaSawuli

1 Kusenjalo, uSawuli wayelokhu ekhihliza izisongo zokubulala abafundi beNkosi. Waya kuMphristi ophezulu 2 wayacela izincwadi eziya emasinagogeni aseDamaseko, ukuze kuthi nxa engafumana khonale labo aba ngabeNdlela, abesilisa loba abesifazana, abalethe eJerusalema sebe yizibotshwa. 3 Wathi esebanga eDamaseko ohanjeni lwakhe, masinyane kwaphazima ukukhanya inxa zonke kuye. 4 Wawela phansi wezwa ilizwi lisithi kuye, “Sawuli, Sawuli, ungihlukumezelani na?”

5 USawuli wabuza wathi, “Ungubani, Nkosi?” Ilizwi lathi, “NginguJesu omhlukumezayo.

6 Manje sukuma uye edolobheni lapho ozatshelwa khona omele ukwenze.”

7 Amadoda ayehamba loSawuli ema lapho esetshe amathe; balizwa ilizwi kodwa kababonanga muntu. 8 USawuli wavuka phansi, kodwa wathi uvula amehlo akhe wayengasaboni lutho. Yikho bamhola ngesandla bangena laye eDamaseko. 9 Wabayisiphofu okwezinsuku ezintathu, engadli njalo enganathi lutho.

10 EDamaseko kwakulomfundi owayethiwa ngu-Ananiya. INkosi yambiza ngombono yathi, “Ananiya!” Waphendula wathi, “Yebo, Nkosi.”

11 INkosi yamtshela yathi, “Hamba uye endlini kaJuda eMgwaqweni oQondileyo, ubuze khona ngendoda yaseThasu ethiwa nguSawuli, ngoba iyakhuleka. 12 Usebelombono wabona indoda ethiwa ngu-Ananiya ifika imbeka izandla ibuyisa ukubona kwakhe.”

13 U-Ananiya waphendula wathi, “Nkosi sengiyizwile indumela yalumuntu mayelana lochuku lonke alwenzayo kwabangcwele bakho eJerusalema. 14 Uze lapha ngegunya aliphiwe ngabaphristi abakhulu ukuzabopha bonke ababiza igama lakho.”

15 Kodwa iNkosi yathi ku-Ananiya, “Hamba! Indoda le iyisiphathelo sami engisikhethileyo ukuthwala ibizo lami phambi kwabeZizwe lamakhosi abo laphambi kwabantu bako-Israyeli. 16 Ngizamtshengisa ukuthi uzahlupheka kanganani ngenxa yebizo lami.”

17 U-Ananiya wasehamba esiya kuleyondlu wangena. Wabeka izandla zakhe phezu kukaSawuli wathi, “Mzalwane, Sawuli, iNkosi – uJesu, owabonakala kuwe endleleni usiza lapha ungithumile ukuze ukwazi ukubona njalo futhi ugcwaliswe ngoMoya oNgcwele.” 18 Masinyane, kwakhithika emehlweni kaSawuli okwakungathi zinkwethu, wasebona njalo. Wasukuma wabhaphathizwa, 19 kwathi esedlile, wathola amandla.

USawuli EseDamaseko LaseJerusalema

USawuli wahlala izinsuku ezithile labafundi eDamaseko. 20 Waseqalisa ukutshumayela emasinagogeni ukuthi uJesu uyiNdodana kaNkulunkulu. 21 Bonke labo abamuzwayo bamangala babuza bathi, “Kasuye yini umuntu lo owenza isigemegeme eJerusalema kulabo abalibizayo lelibizo na? Njalo kezanga yini lapha ukuzabathatha beyizibotshwa abese kubaphristi abakhulu na?” 22 Kodwa uSawuli wasebenza ngamandla amakhulu wadidekisa abaJuda ababehlala eDamaseko ngokubonisa kamhlophe ukuthi uJesu unguKhristu.

23 Sekudlule izinsuku ezinengi amaJuda akha icebo lokumbulala, 24 kodwa uSawuli walizwa icebo labo. Emini lebusuku bamlindela emasinagogeni edolobho ukuze bambulale.

25 Kodwa abalandeli bakhe bamthatha ebusuku bamehlisa ngesitsha esikhaleni esasisemdulini.

26 Wathi esefikile eJerusalema wazama ukuhlangana labafundi, kodwa bonke babemesaba, bengakholwa ukuthi ngempela wayesengumfundi. 27 Kodwa uBhanaba wamthatha wamusa kubaphostoli. Wabatshela ngokuthi uSawuli wayibona njani iNkosi esendleleni esiya eDamaseko watshumayela njani ngesibindi ngebizo likaJesu. 28 Yikho uSawuli wasehlala labo, wazihambela ekhululekile eJerusalema, ekhuluma ngesibindi ngebizo leNkosi. 29 Wakhuluma njalo waphikisana labaJuda besiGiriki, kodwa bazama ukumbulala. 30 Kwathi abazalwane bekuzwa lokhu, bambalekisela eKhesariya bafika bamedlulisela eThasu.

31 Ngalesosikhathi ibandla kulo lonke elaseJudiya leGalile leSamariya laba lesikhathi esihle sokuthula. Laqina; njalo ngokukhuthazwa nguMoya oNgcwele landa ngobunengi, lahlala liyesaba iNkosi.

U-Eniya LoDokhasi

32 Kwathi uPhethro ebhoda phakathi kwelizwe wayakwethekelela abangcwele eLida.

33 Wafumana khonale indoda eyayithiwa ngu-Eniya, eyisigulani esome umhlubulo esehlezi elele okweminyaka eficamibili. 34 UPhethro wathi kuye, “Eniya, uJesu Khristu uyakusilisa. Vuka uthathe icansi lakho.” Masinyane u-Eniya wasukuma. 35 Bonke labo ababehlala eLida laseSharoni bambona baphendukela eNkosini.

36 EJopha kwakulomfundi owayethiwa nguThabitha (nxa kuhunyutshwa kuthi uDokhasi), owayehlala esenza okuhle esiza abaswelayo.

37 Ngasonalesosikhathi wagula wafa, isidumbu sakhe sageziswa salaliswa endlini ephezulu. 38 ILida yayiseduze kweJopha; yikho abafundi sebezwile ukuthi uPhethro wayeseLida, bathuma amadoda amabili kuye bamncenga bathi, “Sicela ukuthi uze ngokuphangisa!”

39 UPhethro wahamba labo, wathi ekufikeni kwakhe wasiwa endlini leyo ephezulu. Bonke abafelokazi bema bemhanqile, bekhala, bemtshengisa izambatho lezinye izigqoko ezazithungwe nguDokhasi esaphila labo.

40 UPhethro wabakhupha bonke endlini; waseguqa ngamadolo wakhuleka. Wasephendukela kowesifazana wathi kuye, “Thabitha, vuka!” Owesifazana wasevula amehlo akhe, wathi ebona uPhethro wahlala.

41 Wambamba ngesandla wamsukumisa. Wasebiza amakholwa labafelokazi wamethula kubo esephila. 42 Lokhu kwasuka kwaziwa kulo lonke iJopha, abantu abanengi bakholwa eNkosini.

43 UPhethro wahlala eJopha okwesikhathi ehlala lomkhuhli wezikhumba uSimoni.